Mae plant yn ardal Heol Pantyffynnon, Rhydaman yn mwynhau maes chwarae cyffrous newydd sy’n cynnwys gwifren wibio.
Mae Parc Heol Pantyffynnon wedi cael ei adnewyddu’n llwyr yn sgil derbyn grant o £50,000 drwy Gronfa Cymunedau Tirlenwi FCC Environment a weinyddir gan y Corff Amgylcheddol WREN.
Roedd Cyngor Sir Caerfyrddin a Phartneriaeth Pantyffynnon wedi cydweithio i drawsnewid y parc.
Cafodd y parc ei ailagor yn swyddogol ar y Diwrnod Chwarae Cenedlaethol gan Anita Jones,  ymgyrchwr sy’n byw drws nesaf i’r parc.
Dywedodd Mrs Jones, 85 oed, fod y parc wedi cael ei roi’n wreiddiol gan Arglwydd Dinefwr ac, fel aelod o bwyllgor y neuadd, ei bod hi wedi helpu i ddechrau’r broses o gael hyd i ffordd o’i adnewyddu.
“Fy wyrion a wyresau oedd y cyntaf i ddefnyddio’r parc. Roedden nhw’n gallu gweld yr offer yn cael ei osod o’m ffenestr!”
Dywedodd Carol Cadman, Is-gadeirydd Partneriaeth Pantyffynnon: “Roedd angen gwella’r parc ac roeddem ni’n ddigon ffodus i gael grant o £50,000 gan WREN. Nid yw’r prosiect wedi cymryd amser hir.
“Buom ni’n ymgynghori â rhieni a phlant ynghylch pedwar cynllun a dewiswyd y cynllun buddugol yn unfrydol.
“Ers i’r parc agor mae wedi bod dan ei sang, hyd yn oed yn y glaw.”
Dywedodd Paula Treharne, Maer y Dref a Chadeirydd y Bartneriaeth: “Mae’n wych. Mae’n dangos beth gallwch chi ei gyflawni drwy gydweithio. Mae’n lle diogel i’r plant chwarae.”
Dywedodd Eamonn Davies, swyddog meysydd chwarae Cyngor Sir Caerfyrddin: “Mae pobl wedi gwneud llawer o waith caled i droi maes chwarae di-raen yn un hyfryd iawn. Fe wnes i lunio cynlluniau a bu’r plant yn edrych arnynt ac yn dweud beth roedden nhw am gael yn y parc. Y wifren wibio a’r siglenni sydd fwyaf poblogaidd.”
Dywedodd y Cynghorydd Meryl Gravell, yr Aelod o Fwrdd Gweithredol y Cyngor dros Adfywio a Hamdden: “Rwy’ wrth fy modd bod y gymuned, y cyngor a WREN wedi cydweithio i adnewyddu’r maes chwarae hwn. Mae’n lle arbennig o dda.”
Dywedodd Meleri Jones, rheolwr grantiau WREN “Mae’r prosiect hwn wedi dangos sut mae cydweithio yn gallu rhoi bod i bethau yn y gymuned. Rydym ni’n falch o gael cefnogi’r prosiect hwn a fydd o fudd i blant a phobl o bob oedran a gallu yn yr ardal.”
Dylai sefydliadau a grwpiau cymunedol sy’n chwilio am gyllid ar gyfer prosiectau llesol edrych ar y wefan www.wren.org.uk neu gysylltu â WREN drwy ffonio 01953 717165.