Mae prydau ysgol yn Sir Gaerfyrddin yn cael eu darparu gan Is-adran Arlwyo Cyngor Sir Caerfyrddin.  

Mae'r adran hon o'r wefan ar gyfer rhieni, athrawon a disgyblion ysgolion cynradd ac uwchradd.  

Mae ysgolion yn lleoedd delfrydol i annog plant i ddewis bwydydd iachach gan helpu i atal gordewdra ymysg plant a’r problemau iechyd sy'n gysylltiedig â hynny. Gall ein staff profiadol, sydd wedi cael hyfforddiant llawn, eich cynorthwyo i ofalu am eich plentyn drwy ddilyn bwydlen iach, sy'n tynnu dŵr o'r dannedd ac sy'n bodloni Canllawiau Cymru ynghylch Maeth. Ein nod yw sicrhau y gellir paratoi pryd iach a maethlon i bob disgybl ac y darperir ar gyfer y rhai sydd â diet arbennig hefyd.  

Rydym yn gweithio mewn partneriaeth â Thîm Iechyd Cyhoeddus Lleol Sir Gaerfyrddin a Dietegwyr Paediatrig y Gwasanaeth Iechyd Gwladol i lunio ein bwydlenni ac un o'n prif flaenoriaethau yw cael y plant i fwyta rhagor o ffrwythau a llysiau.  

Bob diwrnod ysgol, mae ein staff arlwyo'n paratoi mwy na 19,000 o brydau mewn mwy na          130 o sefydliadau addysgol. Mae Hylendid Bwyd yn fater yr ydym yn ei gymryd o ddifrif ac yn ogystal â chynllun cynhwysfawr o hyfforddiant staff, mae gennym system ragorol i sicrhau ansawdd sy’n cyfyngu ar yr holl risgiau a pheryglon sy'n gysylltiedig â gwaith arlwyo, er mwyn sicrhau bod y bwyd yn cael ei baratoi yn y modd mwyaf diogel sy'n bosibl.  

Y Bwyd a Ddefnyddiwn

Mae'n rhaid i'n holl gyflenwyr fodloni safonau penodol ar gyfer ansawdd a hylendid cyn iddynt gael eu hystyried yn ddarparwyr priodol.  

·      Rydym yn prynu bwyd lleol pryd bynnag y bo modd.  

·      Rydym yn cefnogi arferion caffael moesol ac yn prynu nifer o gynhyrchion Masnach Deg ac Organig.  

·      Nid ydym, hyd y gwyddom, yn defnyddio bwyd ac ynddo Gynhwysion a Addaswyd yn Enetig. 

·      Rydym yn gofalu cyfyngu ar faint o halen a ddefnyddiwn wrth goginio.  

·      Pryd bynnag y bo modd, rydym yn coginio'r bwyd yn y ffwrn er mwyn lleihau'r braster sydd yn ein prydau.  

·      Rydym yn cydymffurfio â Safonau Maeth ar gyfer Prydau Ysgol rhaglen 'Blas am Oes' Llywodraeth Cynulliad Cymru.  

·      Rydym yn flaengar o ran hybu ac annog bwyta iach ac rydym yn hoffi gwneud bwyta prydau yn brofiad gwerthfawr i'w fwynhau.  

Manteision eraill bwyta pryd ysgol:  

·      Arbed amser yn y bore gan nad oes angen paratoi cinio a hefyd nid oes angen poeni am gadw bwyd yn ffres ac yn hylan tan amser cinio. 

·      Mae ein prydau'n cynnig gwerth am arian. Gall eich plentyn/plant fwynhau pryd 2 gwrs am ddim ond £2.00 y dydd (yn yr ysgol gynradd), a dim ond £2.00 y dydd (yn yr ysgol uwchradd).   

·      Mae'r plant yn cael budd o fwyta wrth y ford yng nghwmni eraill; anogir y disgyblion i roi cynnig ar fwydydd newydd hefyd.  

·      Mae'r holl brydau'n gytbwys eu maeth ac yn cynnig amrywiaeth o un dydd i'r llall.  

·      Rydym yn darparu ar gyfer llysieuwyr a'r plant hynny sydd ag anghenion dietegol meddygol a chrefyddol.  

·      Rydym yn gyson yn cynnig bwydlen y dydd ar sail thema, yn ogystal â chinio Nadolig 2 gwrs arbennig yn ystod mis Rhagfyr.