Mae’r AGGCC yn paratoi canllawiau bob blwyddyn ar ffurf ‘cylchlythyr’ er darparu gwybodaeth i Gyfarwyddwyr Gofal Cymdeithasol ynghylch paratoi a chyflwyno eu RhDGGC.  Mae detholiad o’r cylchlythyr yn nodi:
‘Bras nod y RhDGGC yw gwella ansawdd a rheolaeth y modd y darperir gwasanaethau cymdeithasol drwy gyfrwng hyfforddiant wedi’i gynllunio a cheisio cynyddu’r nifer sy’n derbyn hyfforddiant ar draws y sector gofal cymdeithasol.  Amcan y RhDGGC yw:
• Cynyddu cyfran y staff ar draws yr holl sector gofal cymdeithasol sy’n meddu ar y cymwysterau, y sgiliau a’r wybodaeth y maent eu hangen, ar gyfer y gwaith a wnânt,
• Cyflawni’r uchod drwy’r RhDGGC a arweinir gan awdurdodau lleol ac a seilir ar wybodaeth comisiynwyr gwasanaethau awdurdodau lleol,
• Mae gweithredu’r RhDGGC a’i ddatblygu ymhellach yn parhau i fod yn flaenoriaeth bwysig yn y fframwaith ‘Creu’r Cysylltiadau – Cyflawni ar draws Ffiniau’ a ‘Bywydau Bodlon: Cymunedau Cefnogol.  Strategaeth ar gyfer Gwasanaethau Cymdeithasol yng Nghymru dros y Degawd nesaf’.

Aiff y cylchlythyr ymlaen i nodi:
• ‘Mae grant y RhDGGC ar gael i gefnogi gwasanaethau a gomisiynir.  Gan mai prif adnodd darparwyr gwasanaethau gofal yw staff, rhaid i’w datblygiad a’u hanghenion o ran hyfforddiant gael ei gynllunio, ei gyllido, ei gyflawni a’i werthuso.  Y cyflogwr sy’n parhau i fod yn bennaf gyfrifol am y tasgau hyn a bwriad y RhDGGC yw ychwanegu at yr adnoddau hyfforddiant sydd gan y cyflogwr.’

Mae’r Uned Hyfforddi, dan arweiniad y Rheolwr Datblygu’r Gweithlu yn cadeirio’r ‘Grŵp Strategaeth Partneriaeth Hyfforddiant Sir Gaerfyrddin.  Unigolion o’r gwasanaethau a’r sefydliadau canlynol sy’n llunio aelodaeth y grŵp ar hyn o bryd:
Cynrychiolwyr Cyngor Sir Caerfyrddin (Hyfforddiant, Comisiynu a Chontractio, Adnoddau Dynol, Prosiectau a Chynllunio)
Cynrychiolwyr y Gwasanaethau Iechyd (Ymddiriedolaeth GIG Hywel Dda)
Cynrychiolwyr y Gwasanaethau Gwirfoddol (Cymdeithas Gwasanaethau Gwirfoddol Sir Gaerfyrddin)
Cynrychiolwyr y Gwasanaethau Gofal Cartref (Cerecare)
Cynrychiolwyr y Gwasanaethau Preswyl (Swanton Care)
Cynrychiolwyr y Gwasanaethau Annibynnol (The Rowan Organisation)
Cynrychiolwyr y Bartneriaeth Ranbarthol (Gofal Cymdeithasol mewn Partneriaeth – De-orllewin Cymru)

Y grŵp hwn, ynghyd â’r Fforwm Darparwyr, sy’n helpu i lywio a darparu gwybodaeth er datblygu grant y RhDGGC ar gyfer Sir Gaerfyrddin.  Mae’r Uned Hyfforddi yn paratoi at gynyddu aelodaeth y Grŵp Strategaeth Partneriaeth Hyfforddiant Sir Gaerfyrddin yn ystod y misoedd nesaf ac ail lansio ei ddiben. Os dymunwch gael mwy o wybodaeth ynghylch ymaelodi, cysylltwch â’r Uned Hyfforddi drwy gyfrwng un o’r dulliau cysylltu a nodir yn y manylion cyswllt.  I gael gwybodaeth am y Fforwm Darparwyr cysylltwch â Chomisiynu a Chontractio Gwasanaethau Gofal Cymdeithasol yr Adran hon.

A oes diagram i ddangos sut mae popeth yn dod ynghyd?

Rhan o Swyddfa’r Cyfarwyddwr yw’r Uned Hyfforddi. Mae Swyddfa’r Cyfarwyddwr yn gyfrifol am amrywiol swyddogaethau allweddol ac yn eu plith mae datblygu a hyfforddi staff.  Rheolir yr Uned Hyfforddi gan y Rheolwr Datblygu’r Gweithlu sy’n gyfrifol am gyflwyno’r RhDGGC flynyddol.  Cefnogir y Rheolwr Datblygu’r Gweithlu gan dîm o staff hyfforddi sy’n anelu at gyflawni nodau ac amcanion y RhDGGC.  Er bod gweithgareddau datblygu a hyfforddi yr Adran Gofal Cymdeithasol, Iechyd a Thai yn canolbwyntio’n bennaf ar y RhDGGC mae cynlluniau hyfforddi a datblygu eraill ar gael yn cynnwys Cronfa Cyfleoedd Ymarfer wrth Hyfforddi (PLOF) ac ymrwymiad yr Adran i ddatblygu ei wasanaethau a’i staff ei hun.

Mae’r staff hyfforddi yn cydweithio i ddatblygu a darparu ystod o raglenni hyfforddiant yn ymateb i’r canllawiau a’r targedau a nodir yn y cylchlythyr.  Y prif erfyn sy’n sicrhau bod yr uned yn rheoli’i hadnoddau yn effeithlon yw’r cylch blynyddol o gynlluniau busnes a ddarperir er cyflwyno’r RhDGGC flynyddol.  Y broses hon sy’n gyrru’r gwaith o ddatblygu’r “Cynlluniau Hyfforddiant”.  Mae swyddogion unigol yn paratoi cyrsiau hyfforddiant i fodloni anghenion y gweithlu ac yn gweithio gyda gwasanaethau i weithredu ystod o ddigwyddiadau hyfforddiant.  Rydym yn casglu gwybodaeth ynghylch yr anghenion hyfforddiant drwy fynychu cyfarfodydd o fforwm y darparwyr er enghraifft. Rydym hefyd yn gweithio gyda rheolwyr a sefydliadau, megis ein cydweithwyr yn y maes iechyd, awdurdodau lleol eraill a gwasanaethau statudol, e.e. yr heddlu, i gynllunio cyrsiau hyfforddiant yn effeithiol yn unol â’r newidiadau mewn deddfwriaeth a safonau.  Mae hyn oll yn ein helpu i flaenoriaethu a chynllunio.

Seilir ein hymagwedd ar ‘un sector - un gweithlu’, sy’n golygu cynnig mynediad i hyfforddiant i wasanaethau wedi’u comisiynu a heb eu comisiynu yn Sir Gaerfyrddin.  Er ein cynorthwyo i fodloni’r canllawiau a bennir yn y cylchlythyr blynyddol,  nid yw’r cyfleoedd hyfforddi a gynigiwn i wasanaethau’r sector annibynnol yn diddymu cyfrifoldeb y sector hwnnw i ddatblygu ei staff ei hun.  Cefnogi a galluogi yw’r dulliau a ddefnyddir gennym.  Rydym yn cefnogi drwy drefnu cyrsiau hyfforddiant a neilltuo llefydd.  Rydym yn galluogi drwy helpu gwasanaethau i ddatblygu eu rhaglenni hyfforddiant mewnol eu hunain.  Mae’r Uned Hyfforddi yn paratoi cynlluniau hyfforddiant blynyddol i fodloni cynifer â phosib o’r anghenion hyfforddiant.  Rydym hefyd yn gweithio mewn cyswllt agos gyda phartner asiantaethau i glustnodi cyfleoedd hyfforddi ar y cyd pan fo’n briodol.  Bydd y digwyddiadau hyfforddiant sydd ar gael i’r sector annibynnol a/neu bartner asiantaethau yn dibynnu ar y grŵp targed a glustnodwyd ar gyfer pob gweithgaredd hyfforddiant .  Ni fydd yr holl ddigwyddiadau hyfforddiant a nodir gennym yma yn berthnasol i bob gwasanaeth neu bartner asiantaethau yn y sector annibynnol.  Bydd pob gweithgaredd hyfforddiant yn cynnwys gwybodaeth am y grwpiau o bobl yr anelwyd yr hyfforddiant atynt, h.y. y grwpiau targed.

Mae’r ‘Sector Annibynnol’ yn cynnwys pob unigolyn cyflogedig a gwirfoddolwr sy’n gweithio i wasanaethau iechyd a gofal cymdeithasol yn Sir Gaerfyrddin, na chyflogir yn uniongyrchol gan y Cyngor Sir nac unrhyw wasanaeth statudol arall megis Ymddiriedolaeth GIG, y Bwrdd Iechyd Lleol, yr heddlu, y gwasanaeth prawf a AGGCC.  Mae esiamplau yn cynnwys sefydliadau neu asiantaethau gofal preifat a gwirfoddol, cynorthwywyr/gofalwyr personol a gyflogir dan drefniadau Taliadau Uniongyrchol neu Gronfa Byw yn Annibynnol (ILF), gofalwyr maeth a gofalwyr Oedolion a Leolir.  Fe ddylech ateb “ydym” i’r ddau gwestiwn canlynol cyn cyflwyno eich cais am hyfforddiant dan y RhDGGC:

• Ydych chi’n darparu gwasanaethau iechyd a gofal cymdeithasol yn Sir Gaerfyrddin?
• Ydych chi’n weithiwr cyflogedig (neu’n wirfoddolwr) un o’r gwasanaethau canlynol:  cartref gofal, gofal cartref, gofal dydd, gwasanaeth seibiant, byw â chymorth, gwasanaeth maeth, cynllun lleoli oedolion, cynorthwyydd personol a gyflogir dan drefniadau taliadau uniongyrchol neu Gronfa Byw’n Annibynnol, gwaith prosiect, gwaith cymunedol, gwasanaeth gwybodaeth, gofalwyr teulu a defnyddwyr gwasanaeth?

Sefydliadau statudol eraill yw ‘partner asiantaethau’ yr ydym yn gweithio mewn partneriaeth gyda hwy i fodloni ein cydgyfrifoldebau statudol.  Yn  Sir Gaerfyrddin mae ein partneriaid yn cynnwys Ymddiriedolaeth GIG Hywel Dda, Bwrdd Iechyd Lleol Sir Gaerfyrddin, GGCC, Heddlu Dyfed Powys, Gwasanaeth Erlyn y Goron a’r Gwasanaeth Prawf.

Ein hamcenion:

• Meithrin ac annog ‘arferion gorau’ wrth hyfforddi a datblygu’r gweithlu ar draws yr holl sector Gofal Cymdeithasol yn Sir Gaerfyrddin.
• Sicrhau / gwella cysondeb y safonau hyfforddiant ar draws y sector Gofal Cymdeithasol yn Sir Gaerfyrddin.

Os oes anghenion datblygu a glustnodwyd heb gael eu diwallu gan y gweithgareddau hyfforddiant a nodir yma, rhaid i gyflogwyr y Sector Annibynnol gyllido neu ddarparu’r hyfforddiant hwnnw eu hunain.